(Facebook lamah pawh ka post nasa tawh a, a inthlahrunawm hle mai. Nimahsela he lei chinah tawn tur a awm tawh dawn miau loh avangin a pamhmai em a, amah CFL Hmingthanga uitu hian tlawm leh zah pawh dawn zo lovin ka rawn mualpho leh lawk a ni e. Amah ka uina hla siam zinga hla pakhat hmang hian thlalak nen atan hun ilo hmang teh ang u. )
MIZO LELTE NUNNEM
Duhthu ai ang sama ka awmhar chang ni hian,
Nunhlui kha chen vui liam ta te zawng kha;
Nang tawn loh nan zawng a pam lua e,
Koh kir theih lah changin a mawi tawh si lo.
I tel lova damchhung chhiar zawng ka zuam lo,
I hringchan thu mai paw’n lunglai a hnem;
I anka mawi leh zai mawi ten lungril a thawi,
A pam lua e aw a pam vawng vawng asin;
Tih mai maw kan biahthu thlun tawp lo ni.
Siamtu duan dan hringmi zaleng hmangaihna,
Lei nun piah ram thleng tura khuanu duan;
A zual zel dawn a hlutna par zu thlum hi,
Chhawm a chawi nungtu Lelte i hlu zual asin.
Zaleng tam thinlung na leh lunglen i thawi dam,
Lawm leh fakna anka biahthu erawh i vai lua e;
Sakhmel hlimten thawidamtu Lelte nunnem kha,
Heti maia zo daia i luangral tur hi tuar har ka ti.
Zo awi tura khuanu duan CFL Hmingthang chuan,
Lal nunnema tang bel turin min lawisan ta maw;
Lo lawm ang che Lal nunnem kan Lelte nunnem kha,
Zai vawr thiamte nen a sulhnu kan rawn chhui e.
1.Mizo Lelte Nunnem CFL HMINGTHANGA.
Zai ri mawi hmanga a awih tlei zofa te hian engtin nge chawimawi a kan hriatreng ang tih chu kan kutah nghahin a awm ta.
2. Mizo Lelte Nunnem CFL Hmingthanga pian leh tuanna vangkhua, a sakruang thamral tura zalha a awmna lo ni ta bawk SAMTHANG khua chu.
Pic. via Lalchhuanmawia Tochhawng
3. MIZO LELTE NUNNEM “CFL Hmingthanga” chuan thlafam vangkhua min lawisan ta. 
10.9.12
Pic. via Ding Liana
4. Zaituah thiam leh zai vawr thiam hmingthang CFL, heti maia dai rial mi chansan hi hriatthiam har kan va ti em. kan chan tur hi i dawn lawmni? Thlah liama i awmdan hi tlawm mahse e, kan thinlungah erawh i lian ber tawh ang a, khumtu che an awm tawh lovang.
Pic. via Ding Liana
5. I laichin unaute chan tur hi i dawn lovem ni, CFL. duh tak ?
6. Mizo Lelte CFL Hmingthanga chu piallei daia zalh turin fam rolung mual panpui a ni ta. A sakruang zalhna tur panpui a nih lai hian YMA Information Centre atangin Loudspeaker-hmanga a zai play a ni bawk. 10.9.12.
Pic. via Ding Liana
“Hei leh chen kan awmkhawharna leh lunglenna min lo thawidam thintu CFL Hmingthanga chuan koh eih theih tawh ngai loh turin thlafam vangkhua min lo lawisan ta. Amah kan hlutzia leh uizia tihlan a, chawimawi chu kan kutah nghahin a awm ta. Ani chuan phut let hauh lovin a hun lo hmang liam tawh mahse kan chawimawi ve dawn lawmni? nge a lei taksa a ral rualin mizo te thinlungah hian nuaibo a a awm ve dawn? Tun hun atan hian a ni dawn lawmni amah kan awih let vena tur chu…………..
